2ed Day اليوم الثاني

بسم الله الرحمن الرحيم

قبل أذكر ملخص و أحداث اليوم الثاني ، أحب أشيد بشيئين لاحظتهم في هاليومين .

أولاً : لاحظت من تجربتي و ردود الكثير في تويتر معاناة السائقين الخاصين و كمّ التعب اللي يمرّون فيه و خصوصاً اللي يعملون عند عوائل عدد أفرادها كبير و دخلهم متوسط أو للحد اللي يجعلهم ما يقدرون يجيبون أكثر من سائق واحد ، أحسست بمعاناتهم لأني أعيش تجربتهم و أعرف مقدار التعب اللي يصِلهم من الجلسة خلف مقود السيّارة أوقات طويلة من النهار والليل مع الزحام و الحر. 

المثير للشفقة و يحزّ بالخاطر أن كثير منهم يُعامل مُعاملة سيئة و كأنه ليس انسان له قيمته و كيانه مثل أي شخص في الوجود. 

تذكرت قصص هروبهم و تمرّدهم على مكفوليهم ، و جاني شعور بالتردّد من اتهامهم و بديت التمس لهم العذر بأنهم فقط قاموا بردة فعل لما كانوا يواجهونه من عدم تقدير و احترام لهم.

كم سيكون جميل لو أن كل سائق أو حتى خادمة أو حارس منزل أو راعي غنم وجد تقديراً لما يُقدمه و يعانيه يومياً من أجل رزقٍ حلال و يُعامَل كمُوظف له حقوق مثل ما عليه واجبات.

ثانياً : أثلج صدري ردود فعل الشباب اللي ميّزوني لما رحت النادي ، شكراً لكم على تفاعلكم من أعماق قلبي ، و تبيّن لي و الحمدلله إن الفكرة وصلت للكثير و فهموا المغزى من التجربة ، و هذا يدل إن الشاب السعودي واعي و مفكّر حتى لو اختلفت آرائهم.

نصل لملخص اليوم ، بدايته كانت لما تجهزت للعمل كان السواق راجع من توصيل الوالدة و يفطر انتظرته يخلص فطور و وصلني الدوام ، كنت مخطط أرجع من الدوام بتاكسي و أخوض تجربة البحث عن تاكسي و الانتظار في الشارع لكن فاجأني السواق إنه ينتظرني من طلعت من المكتب بدون ما أتصل عليه فأجلت التجربة إلى بكرة ، و راح أحاول إن شاء الله أوقف أكثر من تاكسي و أقارن الأسعار. و بالمناسبة عندي تساؤل أتمنى تفيدوني عن خدمة شركات الأجرة ، هل يوجد في السعودية خدمة اتصال على رقم يوصلون لك سيارة أجرة بأقرب وقت ، أقصد شركات الأجرة و ليس سواقين المشوار ، و هل يستخدمون عداد يحسب الأجرة على حسب الوقت و المسافة ؟ . للأسف أشوف النظام يطبق في الخارج و يجعل استخدام التاكسي مريح جداً و ما أعتقد عندنا أنظمة مثل هذي تجعل خيار التاكسي مريح و مناسب لأي شخص و أضيف عليهم وجود حاجز بين السائق و المرتبة الخلفية لكن ما سألت لأنه واضح من منظر سيارات الأجرة أنه لا يوجد.

بعد المغرب بعد مشاوارات مع الوالدة و سؤالها عن احتياجها للسواق اتفقنا انه يوصلني النادي و يرجع يوصلها بيت صديقتها و بعدها يرجع لي في النادي و يوصلني مكان تجمع أصدقائي ( كل هذا بس مشوار الذهاب ، و العودة كان بيرجع أمي و يرجع أختي متطوعة في حملة توعية لسرطان الثدي كان أبوي موصلها في البداية و بعد ما يرجعهم يرجعني ) ، ركبت مع السواق و اتجهنا للنادي قال لي المكيف خربان في النهار ما يبرد يمكن ناقص فريون ، عطيته فلوس و قلت له نزلني في النادي و قلت له اتصل على أمي تأكد متى بيكون مشوارها اذا عندك وقت روح الورشة صلحه ما راح ياخذ وقت معك ان شالله و لما توصّل أمي ارجع لي حتى لو ما اتصلت عليك ، جلست في النادي ما بين ساعة و نص إلى ساعتين ، لما طلعت ما حصلت مكالمات فائتة اتصلت على أمي سألتها طلعت أو لا ، قالت إنها اضطرت تأجل زيارتها بسبب ظروف صديقتها ، قلت و السواق ما كلمك ؟ قالت لا . استغربت إن السواق بالعادة ذكي و يفهم بس عذرته يمكن مع التعب ما فهم ، كلمته أستفسر منه ، قال إنه راح الورشة سأل قالوا له الكهربائي يجي الصباح بس و رجع ينتظر أمي تطلع بس ما قالت له انها بتطلع ، قلت طيب تعال لي أمي ألغت مشوارها ، أخذ منه المشوار حوالي ٢٠ دقيقة في نفس الوقت كنت جوعان و كنت مخطط أمر مطعم قريب من النادي لما صار بياخذ وقت عشان يوصل الفكرة البديهية اللي طرت على بالي إني أقضي الوقت مشي للمطعم و أطلب على ما يوصل بس تذكرت لو بنت صار لها نفس موقفي بتضطر تنتظر يوصل و تمر المطعم بالسيارة و هذا اللي صار ، أخذني من النادي وصلني أصدقائي ، بعدها بساعتين  رجع لي  و وصلني البيت ، و انتهى يومي بهالمشوار. 

كثير سألوني وش اختلف معك ؟ وش شعورك ؟ ، يومين ليست كافية أرد على سؤال كبير مثل هذا بس فيه شغلتين عملوا فارق كبير معي "ما تعودت عليهم بسيارتي" ، الأولى اني قبل أي مشوار لازم أسأل و أخطط مع باقي العائلة ، بالعادة ملك نفسي متى ما قررت أطلع طلعت ، و الثانية اني أضطر أحدد متى أرجع أو أنتقل من مكان لمكان عشان أقدر أعطي السواق فرصة يوصلني من دون ما أحتاج إني أنتظر زيادة عن هذا الوقت .

و في النهاية أتمنى إني ما أكون طولت و كثرت كلام و أعتذر لأي خطأ بدر منّي 

شكراً ...

twitter